രാത്രി ഉറക്കം കുറവാണോ? എപ്പോഴും സ്ട്രെസ്സ് ഉണ്ടോ? നിങ്ങളുടെ തലച്ചോറിനുള്ളിൽ സംഭവിക്കുന്നത് എന്താണ്? ഈ ലക്ഷണങ്ങൾ അവഗണിക്കരുത്!

രാത്രി രണ്ട് മണി കഴിഞ്ഞിട്ടും ഉറക്കം വരാതെ, അസ്വസ്ഥതയോടെ മൊബൈൽ സ്ക്രീനിലെ റീലുകളിലൂടെ വിരലോടിച്ചു കിടക്കാറുണ്ടോ നിങ്ങൾ? രാവിലെ അലാറം അടിക്കുമ്പോൾ കടുത്ത തലവേദനയോടെയും, ഉറങ്ങിത്തീരാത്ത ക്ഷീണത്തോടെയും എഴുന്നേൽക്കേണ്ടി വരാറുണ്ടോ? ജോലിസ്ഥലത്ത് ചെറിയ കാര്യങ്ങളിൽ പോലും ശ്രദ്ധ കേന്ദ്രീകരിക്കാൻ കഴിയാത്ത അവസ്ഥയോ, എടുത്തുവെച്ച സാധനങ്ങൾ പെട്ടെന്ന് മറന്നുപോകുന്ന അവസ്ഥ നിങ്ങളെ അലട്ടുന്നുണ്ടോ? എങ്കിൽ ഓർക്കുക, നിങ്ങൾ ഒറ്റയ്ക്കല്ല. ഇന്നത്തെ പുത്തൻ ജീവിതശൈലി സമ്മാനിച്ച ഈ ‘സാധാരണ ബുദ്ധിമുട്ടുകൾ’ യഥാർത്ഥത്തിൽ നിങ്ങളുടെ തലച്ചോർ തരുന്ന ശക്തമായ ചില മുന്നറിയിപ്പുകളാണ്!

ജൂലൈ 22 ലോക മസ്തിഷ്ക ദിനമായി ആചരിക്കുമ്പോൾ ആരോഗ്യകരമായ ഒരു സമൂഹത്തിനായി നാം ഏറ്റവും ഗൗരവത്തോടെ ചർച്ച ചെയ്യേണ്ട വിഷയവും ഇതുതന്നെയാണ്. അതിവേഗം ഓടുന്ന ഇന്നത്തെ ഡിജിറ്റൽ യുഗത്തിൽ നമ്മൾ ആദ്യം വിട്ടുവീഴ്ച ചെയ്യുന്നത് ഉറക്കത്തോടും വിശ്രമത്തോടുമാണ്. ഒരു ഇന്റർവെൻഷണൽ ന്യൂറോ സർജൻ എന്ന നിലയിൽ വിട്ടുമാറാത്ത മാനസിക സമ്മർദ്ദവും (Chronic Stress) ഉറക്കമില്ലായ്മയും കാരണം മസ്തിഷ്കത്തിലെ രക്തധമനികൾക്ക് കേടുപാടുകൾ സംഭവിച്ച് സ്ട്രോക്ക് ഉൾപ്പെടെയുള്ള ഗുരുതരമായ ന്യൂറോ രോഗങ്ങളുമായി ആശുപത്രികളിൽ എത്തുന്ന യുവാക്കളുടെ എണ്ണം നാൾക്കുനാൾ വർദ്ധിച്ചുവരുന്നു. വെറുമൊരു ലൈഫ് സ്റ്റൈൽ പ്രശ്നം എന്ന് നമ്മൾ നിസ്സാരമായി തള്ളിക്കളയുന്ന ഈ ഘടകങ്ങൾ എങ്ങനെയാണ് നമ്മുടെ തലച്ചോറിനെ നിശബ്ദമായി നശിപ്പിക്കുന്നതെന്നും വലിയൊരു അപകടത്തിലേക്ക് എത്തും മുൻപ് ഇതിനെ എങ്ങനെ പ്രതിരോധിക്കാമെന്നും വൈദ്യശാസ്ത്രപരമായി മനസ്സിലാക്കാം.

ലക്ഷണങ്ങൾ അവഗണിക്കരുത്: പ്രാരംഭ സൂചനകൾ

തലച്ചോറിന് വേണ്ടത്ര വിശ്രമം ലഭിക്കുന്നില്ല എന്നതിന്റെ ആദ്യ ലക്ഷണങ്ങൾ ശരീരം പലരൂപത്തിൽ പ്രകടിപ്പിക്കാറുണ്ട്. ഇവയെ വെറും താൽക്കാലിക ബുദ്ധിമുട്ടുകളായി കണ്ട് തള്ളിക്കളയരുത്:

തുടർച്ചയായ തലവേദന: സാധാരണ വേദനസംഹാരികൾ കഴിച്ചാലും മാറാത്ത രീതിയിൽ ഇടയ്ക്കിടെയുണ്ടാകുന്ന തലവേദന.

ഓർമ്മക്കുറവും ശ്രദ്ധക്കുറവും: കാര്യങ്ങളിൽ ശ്രദ്ധ കേന്ദ്രീകരിക്കാൻ കഴിയാതെ വരിക, ചെറിയ കാര്യങ്ങൾ പോലും മറന്നുപോവുക.

മാനസികാവസ്ഥയിലെ മാറ്റങ്ങൾ: അകാരണമായ ദേഷ്യം, വിഷാദം, പെട്ടെന്നുണ്ടാകുന്ന സ്വഭാവ മാറ്റങ്ങൾ.

അമിതമായ ക്ഷീണം: ആവശ്യത്തിന് വിശ്രമിച്ചാലും മാറാത്ത തരത്തിലുള്ള കടുത്ത ശാരീരിക ക്ഷീണം.

കാഴ്ച മങ്ങൽ അല്ലെങ്കിൽ തലകറക്കം: തലച്ചോറിലേക്കുള്ള രക്തയോട്ടത്തിൽ ഉണ്ടാകുന്ന വ്യതിയാനങ്ങൾ മൂലം താൽക്കാലികമായി ഉണ്ടാകുന്ന തലകറക്കം.

കാരണങ്ങളും അപകടസാധ്യതകളും

ഉറക്കമില്ലായ്മയും സമ്മർദ്ദവും വെറുമൊരു മാനസികാവസ്ഥ മാത്രമല്ല അത് തലച്ചോറിലെ കോശങ്ങൾക്ക് ഘടനാപരമായ കേടുപാടുകൾ വരുത്താൻ കെല്പുള്ളവയാണ്.

നേരത്തെയുള്ള രോഗനിർണ്ണയത്തിന്റെ പ്രാധാന്യം

മസ്തിഷ്ക സംബന്ധമായ രോഗങ്ങളിൽ ‘സമയം’ വളരെ വിലപ്പെട്ടതാണ് (Time is Brain). സമ്മർദ്ദവും ഉറക്കമില്ലായ്മയും തുടരുമ്പോൾ അത് ധമനികളിലെ തടസ്സങ്ങൾക്കോ സ്ട്രോക്കിന്റെ പ്രാരംഭ ലക്ഷണങ്ങളായ ടി.ഐ.എ (Transient Ischemic Attack) എന്ന അവസ്ഥയ്ക്കോ കാരണമാകാം.

ലക്ഷണങ്ങൾ പ്രകടമാകുമ്പോൾ തന്നെ ഒരു ന്യൂറോളജിസ്റ്റിന്റെയോ ന്യൂറോ സർജന്റെയോ സഹായത്തോടെ കൃത്യമായ പരിശോധനകൾ (MRI, CT Angiogram പോലുള്ളവ) നടത്തുന്നത് വഴി ഭാവിയിലുണ്ടായേക്കാവുന്ന വലിയ അപകടങ്ങളെ, പ്രത്യേകിച്ച് മസ്തിഷ്കാഘാതത്തെ (Stroke) ഒരു പരിധി വരെ മുൻകൂട്ടി തടയാൻ സാധിക്കും.

നിങ്ങളുടെ തലച്ചോറിന് സ്വയം സുഖപ്പെടാൻ ആവശ്യമായ കാര്യങ്ങൾ ശീലമാക്കുക:

ഡിജിറ്റൽ ഡിറ്റോക്സ്: ഉറങ്ങുന്നതിന് കുറഞ്ഞത് ഒരു മണിക്കൂർ മുമ്പെങ്കിലും മൊബൈൽ ഫോൺ, ലാപ്ടോപ്പ് എന്നിവയുടെ ഉപയോഗം പൂർണ്ണമായും ഒഴിവാക്കുക. ഇവയിൽ നിന്നുള്ള ബ്ലൂ ലൈറ്റ് ഉറക്ക ഹോർമോണായ മെലാടോണിന്റെ ഉത്പാദനത്തെ തടസ്സപ്പെടുത്തുന്നു.

കൃത്യമായ ഉറക്കസമയം: ദിവസവും 7 മുതൽ 8 മണിക്കൂർ വരെ തടസ്സമില്ലാത്ത ഉറക്കം ഉറപ്പാക്കുക. ദിവസവും ഒരേ സമയത്ത് ഉറങ്ങാനും ഉണരാനും ശ്രമിക്കുക.

വ്യായാമവും മെഡിറ്റേഷനും: ആഴ്ചയിൽ അഞ്ച് ദിവസമെങ്കിലും 30 മിനിറ്റ് വീതം ലഘുവായ വ്യായാമങ്ങളിൽ ഏർപ്പെടുക. ഇത് തലച്ചോറിലേക്കുള്ള രക്തയോട്ടം വർദ്ധിപ്പിക്കും. കൂടാതെ സമ്മർദ്ദം കുറയ്ക്കുന്നതിനായി യോഗയോ ധ്യാനമോ ശീലമാക്കാവുന്നതാണ്.

ലഹരി പദാർത്ഥങ്ങൾ ഒഴിവാക്കുക: ഉറക്കം ലഭിക്കാനായി മദ്യത്തെയോ മറ്റ് ലഹരി പദാർത്ഥങ്ങളെയോ ആശ്രയിക്കരുത്. ഇത് ഉറക്കത്തിന്റെ ഗുണനിലവാരത്തെ (REM Sleep) ദോഷകരമായി ബാധിക്കും. കൂടാതെ ഡോക്ടറുടെ നിർദ്ദേശമില്ലാതെ ഉറക്കഗുളികകൾ കഴിക്കുന്നത് പൂർണ്ണമായും ഒഴിവാക്കുക.

ആരോഗ്യകരമായ ഒരു തലച്ചോറാണ് സന്തോഷകരവും സമാധാനപരവുമായ ജീവിതത്തിന്റെ യഥാർത്ഥ രഹസ്യം! അതിനാൽ മാറുന്ന ജീവിത സൗകര്യങ്ങൾക്കിടയിലും തലച്ചോറിന് ആവശ്യമായ വിശ്രമം നൽകാൻ മടിക്കരുത്. ഓർക്കുക നമ്മെ നമ്മളാക്കി മാറ്റുന്ന, നമ്മുടെ വികാരങ്ങളെയും ചിന്തകളെയും നിയന്ത്രിക്കുന്ന ഈ അത്ഭുത അവയവമാണ് നമ്മുടെ ജീവന്റെയും നിലനിൽപ്പിന്റെയും യഥാർത്ഥ അടിത്തറ.